Psa 50 | SWP | STEP | Eaubada GUIAU, Gigiborina, i ribariba, eo tanoubu i eogalau arinai, mahana ena huia dalasae, i lau e ena huia dui.

Psalms 50

Eaubada ia Tauhedudurai i lolo

1 Eaubada GUIAU, Gigiborina,
i ribariba, eo tanoubu i eogalau arinai,
mahana ena huia dalasae, i lau e ena huia dui.
2 Siona, ana ao lolo dumadumana eai,
Eaubada ena mara i hesinalaei.

3 Eda Eaubada i laolaoma, taba nige i monou,
ia matana eai doha oeagi i alabalebalelem,
mana lailai didigana ia i lauhetaiiri.
4 I eogasae galewa ewana eai
eo tanoubu eai hinage, bena ena tataoyao abo i heduduraidi.
5 “Tausunusunumaegu au heoigogoidima,
isi aitalasam arinai edi aigora arigu eai se ginauri wa!”
6 Galewa ia ena laulau dudurai se hemasaraha
paana Eaubada iabom tauheduhedudurai ede!
7 “Egu tataoyao e, au ataatai abo ea ribariba,
Isaraela e, emi baaea abo ea ribahemasaraha!
Eau Eaubada ede, emi Eaubada.
8 Emi aitalasam debadi eai taba nige ea hegirumiu;
emi aitalasam gabugabudi matagu eai huia gamagamagari.
9 Bulumakau tamoana emi numa eai taba nige ea nuatui,
goti tamoana emi gana eai hinage nige’e.
10 Paana nuura suisuidi gamagaridi eau enaguyao ede,
bulumakau hinage oea tupidi tausani potadi eai.
11 Galewa manudi gamagaridi hinage abidi ea ata’o,
eo ginauri maumauridi gamagamagaridi oea eai isi eau enaguyao ede.

12 “Ena ea guriam, taba nige ea heribamiu;
paana tanoubu maena ginauri gamagaridi eau enaguyao ede.
13 Bulumakau bulumana eau ea aiaini, e nige’e?
Goti osinana hinage ea nomnomi, e nige’e?
14 Lautoi aitalasamna au heaitalasam Eaubada arinai,
eo emi aigora au hemamohoiedi Saesae‐Aririna arinai;
15 huia baaea eai abo au eogalaoma
eau hinage abo ea lebohaimiu, eo omi abo au hedebasaegu.”

16 Na laulau gewagewa tataodi aridi eai Eaubada i ribalau, i ene:
“Ami paisoa saha na egu lauhesom au hasihasiridi,
eo egu ribahesunuma au abi sopamiu eai?
17 Paana heduhedudurai au hewaiunuei,
eo egu riba au gabaedi dagelamiu eai.
18 Taba tauaiyahari au ita, au awaehalau arinai,
tauganaganawari hinage maemiuyao au heboriesegaimiu.

19 “Awam u moselaei riba gewagewa arinai,
memenam eai hinage u riba borabora.
20 Ue bawa na em tau u ribahebaaea,
sinam tahunuana natuna tau u ribahebaaea.
21 Ina laulau ta u laulauedi, na eau ea monou;
u ene bena eau gonogonoana doha oa.
Abotai ea ribasuuim, eo giru wa ea tore oa matam eai.

22 “Ina ta au nuanuatui, omi aidobu Eaubada au nuahuiei,
ata ea purisimiu, na nige esau bena i toro i saguhaimiu!
23 Eai to eai lautoi i leama, ia ena heasisi enagu i hemasaraha;
eai to eai ena dobila i hedudurai
ia arinai Eaubada ena abihemauri abo ea hemasaraha.”